Í nógv ár hevur verið ynski um at fáa gjørda brúgv um ánna við Hulduheyggin, soleiðis at sleppast kann at húsunum norðanfyri, uttan at skula koyra gjøgnum alla bygdina.
Eisini vil tað gera tað nógv lættari hjá størri bilum sum oljubili og ruskbili at røkka húsunum norðanfyri.
Ikki minst hevur brúgvin týdning fyri Gjáargarð, tí tá hon er komin, sleppa bussar heilt at hotellinum, soleiðis at gestirnir verða koyrdir upp á pláss, og nógv av tí sera darvandi bussferðsluni verður leidd út um bygdina.
Nú er endiliga útlit fyri, at hendan brúgv verður veruleiki. Seinastu dagarnar hava menn frá Sunda Kommunu arbeitt við fyrireikingunum til brúnna, og nú er fundament stoypt, so at klárt er at seta brúnna upp.
Brúgvin er keypt úr Danmark sum betongelementir, og tá hon er sett upp - vónandi seinni í hesari vikuni - er bert eftir at gera vegirnar báðu megin. |
